Numbers 34
Leviticus « Numbers 33 ‹ Numbers 34 › Numbers 35 » Deuteronomy
ԵՐԿՐԻՆ ՍԱՀՄԱՆՆԵՐԸ
1Տէրը խօսեցաւ Մովսէսի՝ ըսելով.
2«Իսրայէլի որդիներուն պատուիրէ՛ եւ անոնց ըսէ՛. “Երբ Քանանի երկիրը մտնէք, (ահա՛ւասիկ այն երկիրը՝ որ պիտի 1տրուի ձեզի իբր ժառանգութիւն, այսինքն Քանանի երկիրը՝ իր սահմաններով,)
3ձեր հարաւային 2սահմանը՝ Սինի անապատէն մինչեւ Եդովմի եզերքը պիտի ըլլայ։ Արեւելքէն՝ ձեր հարաւային սահմանը Աղի ծովուն ծայրէն պիտի 3սկսի.
4յետոյ ձեր սահմանը Ակրաբիմի զառիվերին հարաւային կողմը պիտի դառնայ, Սինէն պիտի անցնի, եւ Կադէս-Բառնեայի հարաւային կողմը յանգի. ապա Ասար-Ադդարէն ելլելով Ասեմոնէն պիտի անցնի,
5ու սահմանը Ասեմոնէն մինչեւ Եգիպտոսի վտակը պիտի դառնայ եւ ծովը յանգի։
6Արեւմտեան սահմանին համար՝ 4Մեծ ծովը՝՝ պիտի ունենաք իբր սահման. ա՛յս պիտի ըլլայ ձեր արեւմտեան սահմանը։
7Ահա՛ւասիկ ձեր հիւսիսային սահմանը.— Մեծ ծովէն մինչեւ Հովր լեռը նշանակեցէ՛ք ձեզի.
8Հովր լեռնէն մինչեւ Եմաթի մուտքը նշանակեցէ՛ք, ու սահմանը Սեդադ պիտի յանգի։
9Ապա սահմանը Զեփրոնէն պիտի ելլէ եւ Ասար-Ենան յանգի. ա՛յս պիտի ըլլայ ձեր հիւսիսային սահմանը։
10Ձեր արեւելեան սահմանին համար՝ Ասար-Ենանէն մինչեւ Սեփամ նշանակեցէ՛ք։
11Այս սահմանը Սեփամէն Ռեբղա պիտի իջնէ, Այինի արեւելեան կողմը. յետոյ սահմանը պիտի իջնէ ու Քեներէթի ծովուն 5եզերքին դպչի՝՝, արեւելեան կողմը։
12Ապա սահմանը Յորդանան պիտի իջնէ եւ Աղի ծովը յանգի։ Ա՛յս պիտի ըլլայ ձեր երկիրը՝ իր շրջակայ սահմաններով”»։
13Մովսէս Իսրայէլի որդիներուն պատուիրեց. «Ա՛յս է այն երկիրը, որ դուք վիճակով պիտի ժառանգէք, ինչպէս Տէրը պատուիրեց որ ինը տոհմերուն ու կէս տոհմին տրուի.
14արդարեւ Ռուբէնի որդիներուն տոհմը՝ իրենց նահապետութիւններուն համեմատ, Գադի որդիներուն տոհմը՝ իրենց նահապետութիւններուն համեմատ, եւ Մանասէի կէս տոհմը իրենց ժառանգութիւնը ստացան։
15Այս երկու տոհմերն ու կէս տոհմը իրենց ժառանգութիւնը ստացան Յորդանանի այս կողմը, Երիքովի դիմաց, դէպի արեւելք»։
ԵՐԿՐԻՆ ԲԱԺԱՆՈՒՄԻՆ ՊԱՏԱՍԽԱՆԱՏՈՒՆԵՐՈՒՆ ԱՆՈՒՆՆԵՐԸ
16Տէրը խօսեցաւ Մովսէսի՝ ըսելով.
17«Ահա՛ւասիկ այն մարդոց անունները՝ որոնք երկիրը ձեզի ժառանգել պիտի տան.— Եղիազար քահանան, Նաւէի որդին՝ Յեսու,
18եւ ամէն տոհմէ ալ իշխա՛ն մը առէք՝ որպէսզի երկիրը ժառանգել տան։
19Ահա՛ւասիկ այդ մարդոց անունները.— Յուդայի տոհմէն Յեփոնէի որդին՝ Քաղէբ,
20Շմաւոնի որդիներուն տոհմէն Ամիուդի որդին՝ Սամուէլ,
21Բենիամինի տոհմէն Քասղոնի որդին՝ Ելդադ,
22Դանի որդիներուն տոհմէն Եգղիի որդին՝ Բոկկի իշխանը,
23Յովսէփի որդիներէն՝ Մանասէի որդիներուն տոհմէն Եփոտի որդին՝ Անիէլ իշխանը,
24ու Եփրեմի որդիներուն տոհմէն Սափաթանի որդին՝ Կամուէլ իշխանը,
25Զաբուղոնի որդիներուն տոհմէն Փառնակի որդին՝ Եղիսափան իշխանը,
26Իսաքարի որդիներուն տոհմէն Ազանի որդին՝ Փաղտիէլ իշխանը,
27Ասերի որդիներուն տոհմէն Սելոմիի որդին՝ Աքիուդ իշխանը,
28ու Նեփթաղիմի որդիներուն տոհմէն Ամիուդի որդին՝ Փադայէլ իշխանը։
29Ասո՛նք են այն մարդիկը, որոնց Տէրը պատուիրեց Իսրայէլի որդիներուն ժառանգութիւնը տալու՝ Քանանի երկրին մէջ»։